ملف شامل على10 انواع من اشهى اطباق الفرن((لڭراتان))

**Admin** الإثنين يوليو 05, 2010 7:38 am

ڭراتان بالكفتة محشوة بالبيض:

المقادير:كفتة متبلة+بيض السمان مسلوق+بطاطا مسلوقة فالما والملح+بصلة مشحرة فالزيت مع الملح والبزار+بيشاميل +فرماج
الطريقة:تبلت الكفتة وكورتها بعد ما حشيتها بالبيض المسلوق
وخلطت البطاطا المسلوقة مع البصلة والقليل من البيشاميل وفرشتهم فالطاوة
ليتدخل الفرن وستفت عليهم كويرات الكفتة وفالاخير خويت عليهم صلصة
البيشاميل بالفرماج ورشيت عليهم شوية المعدنوس مفروم ودخلتو للفرن

ڭراتان الدنجال محشي:

المقادير:شرائح الدنجال+بطاطا مسلوقة +كفتة+بصلة مشحرة فالزيت والملح
والبزار+الربيع+التوابل (حسب الدوق)صلصة الطماطم والبصل+كريم فريش
الطريقة:باش الدنجال مايشرب
ش الزيت بزاف قطعتو شرائح ودهنتو بالزيت وستفتو فصينية ودخلتو للفرن
وخلطت بطاطا مسلوقة +كفتة+بصلة +الربيع+التوابل ودرت بيهم كويرات ولفيت
عليهم شرائح الدنجال وستفتهم فالصينية وخويت عليهم الصلصة ليمتكونة من
البصل والطماطم والكريم فريش ودخلتهم للفرن

ڭاتران بخضر مشكلة:

المقادير:فلفل مقطع مربعات ومقلي فالزيت والملح+لوبيا شعراوخيزو مسلوقين
فالماء والملح+بطاطا مقلية+ڭرعة مقلية فالزيت مع التوم والبزاروالملح+
خليط مكون من لكريم فريش والبيض+والفرماج والقليل من الربيع
الطريقة:خلطت هاد المقادير كلها وخويتها فصينية ودخلتها للفرن

كران الوجدي:

المقادير:ليتر ماء+كاس عامر مزيان بدقيق الحمص+2بيضات+نص كاس زيت+ملح حسب الدوق
الطريقة تخلطي دقيق الحمص مع الما مزيان وتخليه مدة 4 ساعات علا
الاقل،وتعاودي تخلطيه وضيفي البيض والزيت والملح وتخوي الخليط فصينية
ودخليه الفرن
ملاحضة هو راه يكون جاري بزآاف حتا كادخليه للفرن عاد يعقاد
وكايتقدم مع الكامون والسودانية والباڭيط

ڭراتان بالكفتة والصلصة:

المقادير:بطاطا مسلوقة فالما والملح+الربيع+مطيشة+البصلة
التوم+التوابل+الفلفل+الشومپينيون طري+كفتة متبلة ومخلطة (بالبيض ولبابة
الخبر مرطبة فالحليب)
الطريقة: طحنت مطيشة مع البصلة والتوم والبزار وسكينجبيروالملح والخرقوم والسودانية والتحميرة
ستفت البطاطا فالصينية ورشيت عليها الربيع مفروم وخويت عليها صلصة مطيشة
وستفت عليها الشومپينيون وزت عليها الفلفل مقطع دوائر ومقلي فالزيت وفالاخير كويرات الكفتة ودخلتهم الفرن

ڭراتان بالعجائن:

هاد العجائن كنت درتهم لغدا وشاطولي ما بغيتش نرميهم ودرتهم فصينية ديال
الفران ودرت عليهم المدزريلا والجبن الاحمر وزعيترة ودخلتهوم الفران
وهاكدا صدقت ماضيعت والو هههه

ڭراتان بالبطاطا والكفتة:

شحرت البصلة فالزيت والملح والبزار حتا نزلات وعاد ضفت الكفتة والربيع
سلقت البطاطا ومعستها مزيان مع الفرماج
اما البيشاميل خلطت فيه 2 انواع الفرماج مع معلقة صغيرة من مركز الطماطم باش يعطينا اللون زوين
فصينية ديال الفران فرشت شوية من البيشاميل ودرت عليه الكفتة ودرت عليها
البطاطا تم البيشاميل تم الكفتة تم البطاطا فالاخير البيشاميل ودخلتها
للفرن

ڭراتان بالبروكولي والكفتة:

شحرت البصلة فالزيت والملح والبزار حتا نزلات وعاد ضفت الكفتة
سلقت البروكولي فالما والملح
درت طبقة ديال الكفتة وطبقة بروكولي وطبقة خرى كفتة وطبقة بروكولي وفالاخير صلصة البيشاميل بالفرماج
ودخلتهم للفرن

ڭراتان بالكرم محشو:

المقادير:الكرم مسلوق+روز مسلوق+بطاطا مسلوقة+صلصة البصلة ومطيشة+البصلة مشحرة مع الكفتة متبلة والكروفت مسلوق من قبل+فرماج السندويش
الطريقة:شحرت البصلة مزيان وضفت عليها الكفتة متبلة والكروفت مسلوق وخلطهم
مع الروز وعمرت بيهم اوراق الكرم..فصينية ديال الفران فرشت الصلصة ديال
مطيشة والبصلة وستفت عليها البطاطا ولفائف الكرم المحشو ودرت عليهم
الفرماج وفالاخير الصلصة ودخلتهم الفران

ڭراتان بالسمك الابيض والطون:

المقادير:بطاطا مسلوقة +بزار+ كمون+خرقوم+ملح+ربيع+بيضة+طون+وسمك ابيض
مقلي من قبل،،انا كان شاطلي من لغدا،،فرماج السندويش+كريم فريش مدوب فيه
الفرماج الاحمر
الطريقة:خلطت البطاطا مع التوابل والربيع والطون والسمك والبيضة وسرشت
طبقة فالصينية وستفت عليها فرماج السندويش ودرت طبقة اخرى ديال خليط
البطاطا وفالاخير الكريم فريش بالفرماج ودخلتهم للفران

وليشاطلي من خليط البطاطا درت بيه كويرات ودوزتهم فالبيض والدقيق وقليتهم علا شكل معقودة

ڭراتان باللحم والسكوم؛

المقادير:لحم مقطع مكعبات+بصلة+درس ديال التوم+علبة سكوم+ملح ابزار+ربيع+بيشاميل +الفرماج
الطريقة:قليت اللحم فالزيت مع الملح والبزار وراس ديال التوم وافي ملي بدا يدخلو الطياب ضفت عليه البصلة
فصينية ديال الفران فرشت اللحم وزرت عليه السكوم وزدت طبقة خرا ديال اللحم وفالاخير درت البيشاميل والفرماج محكوك ودخلت الصني للفران

الإثنين	الثلاثاء	الأربعاء	الخميس	الجمعة	السبت	الأحد
				1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30